ROXAS CITY – Dismayado ang pamilya tupas sa bailan district hospital matapos wala ginpahibalo sa ila ang gindangatan sang ila bag-o bun-ag nga lapsag sa diin ginaalegar nabalian ini sang tul-an sa butkon.
Sa interview sang Bombo Radyo kay Mr. Junlix Balagosa Tupas Jr., amay sang lapsag, suno diri nagpadulong ini sa ospital ginabulubanta 12:00 sang udto sang Lunes, Enero 8 bangud magabata na ang iya asawa.
Gilayon man sila nga gintatap sang mga staff sang ospital kag takna 2:00 sang hapon, gin-anunsyo sang nag-atender nga doctor nga safe ang pagbata sang iya misis apang nabudlayan lang ang mga ini bangud daku ang lapsag nga nagabug-at sa 4.3kls.
Suno diri, naglisensya ang mga staff sa iya misis nga butangan sang tubo ang bata bangud nabudlayan ini magginhawa kag gin-advised nga magbalhin sang ospital sa syudad.
Masuwerte naman nga nakakita sila sang masaylohan nga ospital sa Capiz Doctors Hospital sa diin ginrequest sang doctor nga ipaidalum sa swab test kag x-ray ang lapsag antes dal-on sa ospital 10:00 sang gab-i.
Apang daku na lang ang kakibot sang pamilya Tupas, sa gulpi pagpalanggit-um sang lapsag.
Pahayag sini, nakalab-ot sila sa CDH ginabulubanta 12:00 na sang maga-aga.
Indi mahibaluan ni Junlix kun ano ang dapat nga mabatyagan sang nakahinala sini ang doctor, nga yara sa kritikal nga kondisyon ang lapsag kag bali ang tul-an sa natuo nga butkon sandig sa nangin resulta sang x-ray examination.
Depensa naman ni Junlix, wala sila ginpahibalo sang mga staff sang Bailan District Hospital sa matuod nga estado sang ila bata kag nagsunod malang sa ila mando bangud sila ang may ihibalo pag-abot sa medikal.
Gin-advised naman sang doctor suno diri nga kinahanglan insigida ma-operahan ang lapsag.
Bangud sini, nagapanawagan sang pangamuyo kag bulig pinansyal ang pamilya Tupas sa may binulawon nga tagipusuon agud ma-operahan gilayon ang ila bata.
Mahibaluan nakatubo sa gihapon ang lapsag kag naka-admit sa CDH.
𝐒𝐚 𝐥𝐮𝐲𝐚𝐠 𝐦𝐚𝐠𝐡𝐚𝐭𝐚𝐠 𝐬𝐚𝐧𝐠 𝐛𝐮𝐥𝐢𝐠 𝐲𝐚𝐫𝐢 𝐚𝐧𝐠 𝐆𝐂𝐀𝐒𝐇 𝐍𝐮𝐦𝐛𝐞𝐫 𝐧𝐢 𝐉𝐮𝐧𝐥𝐢𝐱 𝐓𝐮𝐩𝐚𝐳 𝐉𝐫. 𝟎𝟗𝟎𝟔𝟕𝟏𝟓𝟏𝟎𝟒𝟏.
