ROXAS CITY – Ginpahibalo ni late Governor Roel Degamo si anay Presidente Rodrigo Duterte nga may nababaton ini nga pagpamahug sa iya kabuhi ukon death threat sang nanliligad nga mga tinuig apang wala ini nahatagan sang atensyon sang anay presidente.
Ini ang ginpahayag ni Ms. Grace Agabon, Public Information Officer sang Negros Oriental Provincial Government sang mainterview sang Bombo Radyo.
Pahayag ni Agabon nga guilty ang anay administrasyon nga wala ini gilayon nga naaksyunan kag pamatuod na diri ang pagpadulong sang mga higher officials kasubong ni President Ferdinand ‘Bongbong’ Marcos Jr., mga senador kag iban pa nga pulitiko sa haya sang gobernador.
Gintuad man sini, nga indi na lipod sa ihibalo sang kadam-an kun sin-o ang mastermind sa pagpatay sa gobernador bangud madugay na ini nga nakakabaton sang death threat sa kasumpong sini sa pulitika.
Madugay na ang ‘intense political rivalry’ sa tunga sang Degamo kag Teves, kun sa diin mas naglala pagid ini sang nagbalik na sa kapitolyo kag nagpungko bilang gobernador si Degamo sang Oktubre 5, 2022.
Sa pihak nga bahin, nagbubo ang pakig-unong sa pamilya Degamo kun sa diin linibo nga pumuluyo ang nagpadulong sa kapitolyo kun sa diin temporaryo nga nakahaya si Degamo agud makit-an sa katapusan nga tinion ang gobernador.
Mabatyagan naman sang Negros Oriental ang kasubo sa pagtaliwan sang gobernador kun sa diin pamatuod diri ang pagbisita sang mga tagasuporta sa iban nga lugar agud makita lang si Degamo.
Mahibaluan nga bukas 24 oras ang kapitolyo para sa public viewing.
Samtang, natalana naman nga igabalhin sa ila balay si Degamo sa Domingo, Marso 12 kag igalubong sa Marso 16.
