ROXAS CITY — Patay na sang masapwan ang 60-anyos nga tigulang nga nalumos matapos mahulog sa ginasakyan nga baroto sang nabungguan sila sang isa pa ka baroto sa suba sa banwa sang Pontevedra, Capiz.
Sa exclusive interview sang Bombo Radyo kay PSI Marvin Balmes, hepe sang Pontevedra PNP, ginpahayag niya nga nasapwan ang bangkay ni Nida Belalo sang Barangay Bantigue, Panay sa lugar malapit man sa iya nalumsan.
Mahibaluan nga sakay si Belalo sa depampasahero nga baroto kaupod ang indi magnubo sa napulo pa ka mga pasahero padulong sa banwa sang Pontevedra kagapon sang natabo ang insidente.
Ginaalegar nga nasamad ang motor sang nakasugata nila nga baroto nga ginadala sang isa ka menor de edad kag wala ini makalikaw nga mabungguan ang depampasahero nga baroto nga ginadala ni Nilo Abarte.
Bangud sa kakulba sang mga pasahero sa baroto, nagpakilid sila agud makalikaw nga maigo sang nagapakari nga baroto rasun nga nadulaan ini sang panimbang kag nagtakilid kag nahulog ang tigulang.
Ginpahayag nga nadaho pa sang tigulang ang iya dala nga tatlo ka tuig nga apo sa iya mga kaupdanan sa baroto antes siya nalumos.
