Nagapati ang isa ka legal expert nga may kinamatarong ang tanan nga akusado sa patas ukon right to a fair trial nga ginhingyo sang depensa ni Former President Rodrigo Duterte nga nagapatubang sang kaso crimes against humanity sa International Criminal Court ukon ICC.
Sa interview sang Bombo Radyo kay Atty. Joenar Pueblo, President sang Philippine Arbitration Center in Visayas, iya ginpahayag nga kabahin ini sang ginakwestyon sang legal team ni Duterte sa ila petisyon nga i-drop ang mga dokumento nga ginpresentar sang prosekusyon batok sa anay presidente.
Suno kay Pueblo, maga-agi pa sa maid-id nga proseso ang ginahingyo sang depensa kag pagatun-an sang korte ang mga argumento kag dokumento nga ginpresentar sa ICC.
Nahibaluan nga nagpetisyon ang mga abogado ni Duterte nga dulaon ang mga dokumento sang prosekusyon batok sa iya, nga suno sa depensa, nagalapas sa iya fundamental right sa fair trial.
