ROXAS CITY – Yara sa kapin 17 ka mga barangay sa banwa sang Dumarao ang apektado sang pagbaha tuga sang bagyong Agaton.
Ini ang ginpahayag ni Mayor Edgardo Arancillo sang ma-interview sang Bombo Radyo.
Suno kay Arancillo, nga kapin 100 ka households ang naapektuhan sang pagbaha sa ila banwa kag yara sa 1,143 ka mga pamilya ukon 3,093 ang nag-evacuate sa mga evacuation centers.
Dugang pa sini nga nakapanghatag na sila sang ayuda sa pila ka mga barangay nga apektado kag naghatag man ang pila ka mga pribado nga organisasyon.
Pag-abot naman sa agrikultura yara sa kapin P6 milyon ang kahalitan samtang sa imprastraktura ginabanta yara sa P28 milyon kag ini ang ginalauman nga magataas pa.
Natalana naman nga magapaguwa sang pondo ang ila LGU sa masunod nga semana kag gilayon nila ini nga pagagamiton agud ipangbakal sang mga food packs kag ipanagtag sa mga apektado nga pumuluyo.
Nagpanugyan man ini sa mga pumuluyo sa ila banwa nga maghulat lang sa mga ayuda nga magaabot bangud ginasiguro sini nga mahatagan gid ang tanan nga apektado.
