IVISAN, CAPIZ – Prioridad nga mapasangkad sang Local Government Unit ang trabaho kag ekonomiya sa banwa sang Ivisan, Capiz
Sa ginpatigayon nga press briefing sa banwa sang Ivisan, Capiz kaupod ang Bombo Radyo kay Mayor Ipe Neri Yap, sang Municipality of Ivisan, Province of Capiz, iya ginpahayag nga lakip sa palaabuton nga mangin proyekto ang Local Economic Enterprise “LEE”, kun sa diin maga earn ang LGU, Public Market nga makabulig sa tagsa ka market vendors nga indi na sila pagbahaon kag indi na ma perwisyo ang ila ginabaligya nga paninda.
Suno kay Yap bag-o nga pasilidad sang Public Market ang ginatan-aw nga mangin sabat nga magdamu ang maganahan sa pagpaninda, kag magnegosyo agud mahatagan sila sang matinlo, organisado, kag komportable nga lugar para sa ila pangabuhian kag pagpaninda
Pahayag pa niya lakip man sa mga proyekto nga ginapaabot nga makahatag sang dugang nga kaayuhan sa banwa ang pagtukod sang Ivisan Ariba RORO Terminal ini ginapa-abot nga makabulig sa transportasyon, negosyo kag serbisyo sing madali, samtang, ang Cemetery Memorial Park naman magin lugar para sa mga pumuluyo nga nagapangita sang desente nga himlayan para sa ila mga pinalangga nga nagtaliwan.
Sa karon, nahibaluan nga ang mga nasambit nga proyekto nagapakita sang padayon nga panikasog nga mapauswag ang imprastraktura, serbisyo kag ekonomiya sang banwa, kag makahatag sang mas madamo nga oportunidad kag mas maayo nga kahimtangan sa kabuhi sang mga pumuluyo
