Kapin 942 ka mga benepisyaryo gikan sa 12 ka barangay sa banwa sang Maayon ang nakabaton sang tag-10 ka kilo nga libre nga bugas sa ginpatigayon nga distribusyon sang Gobyerno Probinsyal sang Capiz kag Provincial Social Welfare and Development Office (PSWDO) sang Hunyo 1 sa Tuburan Covered Gym.
Lakip sa mga nakabenepisyo amo ang mga mangunguma, mangingisda kag mga miyembro sang Pantawid Pamilyang Pilipino Program (4Ps), nga ginakabig nga mga sektor nga labi nga naapektuhan sang nagapadayon nga krisis sa enerhiya.
Ang mga benepisyaryo nagikan sa mga barangay sang Tuburan, Alasaging, Quevedo, Duluan, Parallan, Maalan, Bongbongan, Guinbailan, Aglimocon, Canapian, Manayupit kag Quinabonglan.
Suno sa mga opisyal, ang distribusyon sang bugas kabahin sang padayon nga mga programa sang PSWDO kag sang Gobyerno Probinsyal sang Capiz nga nagatuyo maghatag sang bulig sa mga komunidad nga nagakinahanglan, ilabi na sa tion sang mga krisis kag iban pa nga mga kabudlayan nga ginapangatubang sang mga pumuluyo.
