ROXAS CITY – Bugal sang probinsya sang Capiz nga may makabig kita nga mga tumandok natun nga baganihan ukon mga local heroes.
Suno kay outgoing Governor Esteban Evan Contreras, nagakadapat nga atun sila kilalahon kag komemorahon, bangud kalakip sila sa mga nauna nga nagpakigbato sang aton probinsya sa pagpanakop sang mga dumuluong.
Isa na diri si General Esteban Dichosa Contreras, anak nanday Simeon Contreras kag Carmen Dichosa, nga natawo sang Mayo 12, 1864 kag ginatawag bilang “Hangaway sang Capiz” bangud man sa iya nangin kontribusyon sa pagpakigbato sang kahilwayan batuk sa Espanyol kag subong man sa mga Amerikano.
Suno kay Governor Contreras, ba-se sa ginpasa nga kasaysayan sa ila pamilya, ginakilala ang iya lolo nga si General Contreras bilang isa ka lokal nga baganihan bangud sa iya nangin pinasahi nga estilo sa pagpakig-away batuk sa mapanakop nga Espanyol.
Nahibaluan nga ginpaagi ni General Contreras sa paghiwat sang pagkinasadya agud tipunon ang iya mga tinawo kag makapatigayon sang pagplano batuk sa pagsalakay sa mga mapintas nga Espanyol.
Nagtaliwan si General Contreras sang tuig 1904 matapos nga gin-igo sang malala nga lagnat.
Samtang, iban pa sa mga lider nga mga baganihan nga tumandok sang Capiz amu sanday anay Sen. Jose Altavas, kag anay Presidente Manuel A. Roxas.
