ROXAS CITY – Ginalantaw sang mga kapulisan ang anggulo nga ‘love triangle’ sa pagluthang-patay sa 23-anyos nga lalaki sa Barangay Capuyhan, Sigma, Capiz.
Sandig sa ginpahayag ni Police Captain Dennis Losbañes, hepe sang Sigma Municipal Police Station sang ma-interview sang Bombo Radyo Roxas.
Suno kay Capt. Losbañes, nag-angkon sang patal nga pilas sa ulo ang biktima nga si alyas Jonald tuga sang pagpangluthang sang wala pa ginhingadlan nga suspek.
Narekober sa lugar ang isa ka basiyo sang ginaalegar 9mm pistol nga ginapatihan gingamit sang suspek sa pagpangluthang.
Dugang pa ni Losbañes, nagakooperar naman ang live-in partner sang biktima agud mahatagan sang hustisya ang kamatayon ni Alyas Jonald kag posibilidad nga pagka-aresto sang suspek nga nagapabilin nga at-large.
Sa karon, nagapadayon pa ang imbestigasyon sang mga otoridad angut sa insidente kag Natalana naman nga ipaidalom ang bangkay sang biktima sa postmortem examination agud matumod kun ano ang gintunaan sang iya kamatayon.
