ROXAS CITY – Ginparada kag ginpabugal sang mga representante sang kada banwa ang ila tagsa ka mga maduagon kag maanyag nga float kadungan sang Maragtas sang Capisnon Parade and Performances Capiztahan 2024.
Ang nasambit nga selebrasyon, ginpangunahan mismo ni Capiz Governor Fredenil H. Castro kadungan sang iya kaadlawan subong nga adlaw Abril 27, 2024, kaupod si Roxas City Mayor Ronnie Dadivas kag pila ka mga opisyales sang probinsya.
Mahibaluan nga temprano pa nga nagsugod ang parada kung sa diin nagikan sa may bahin sang Barangay Baybay kag padulong sa Pueblo de Panay, Techno Park.
Apisar nga tuman ka init, makit-an sa gihapon ang mga maanyag nga yuhom sang mga performers.
Nanari-sari nga mga desinyo ang makit-an sa mga float kung sa diin indi mapanginwala nga ginpainan kag ginhatagan sang nagakaigo nga pondo sang tagsa ka mga munisipalidad.
Matandaan, ginkilala bilang 1st runner up sa amu nga aktibidad ang banwa sang President Roxas.
