ROXAS CITY – Arestado ang mag-asawa matapos ginserbihan sang mandamiento de aresto sang mga kapulisan sa Barangay Sta. Cruz, Ivisan, Capiz.
Ginkilala ang mga nadakpan nga sanday Mary Joy Altamia Ong kag Gerard Villasoto Ong, lunsay mga residente sang Barangay Ilaya-Ivisan, Ivisan, Capiz nga akusado sa kaso nga Estafa.
Ang warrant of arrest batuk sa mga akusado ang ginpirmahan kag ginpapanaog ni Judge Esperanza Isabel Poco-Deslate sang Regional Trial Court, 6th Judicial Region, Branch 19 sadtong Mayo 27, 2019 kun sa diin ginrekomendar sang korte ang tag-P180, 000 nga piyansa sa tagsa ka akusado para sa ila temporary nga kahilwayan.
Sa interview sang Bombo Radyo sa tagreklamo nga si Meldin Frias, nagpakig-transaksiyon sa iya ang mag-asawa nga nagpakilala nga subcontractor sang isa ka construction firm nga NJ Construction Supply.
Ginpahayag sini nga agalab-ot sa kapin 1.2 milyones pesos nga balor sang krudo kag gasolina ang natigayon nga makuha sang mga suspek kag gin-isyuhan siya sang tseke nga lunsay nagtalbog sa bangko.
Ang nasambit nga mga suspek ang nagapangatubang man sang kaso nga paglapas sa Batas Pambansa Blg. 22 ukon paglapas sa ‘Bouncing Checks Law’.
Ginpahayag naman ni Police Captain Rene Hare, hepe sang Ivisan Municipal Police Station nga sadto pa man may mga nagpabalhag na nga mga persona nga ginareklamo ang nasambit nga mag-asawa.
Gindugang pa sini nga bukas ang ila nga talatapan sa kun sin-o man ang luyag magpalab-ot sang reklamo nga natuntuhan man sang nasambit nga mga suspek.
