ROXAS CITY – Patay ang maglola, matapos ginapahayag nga nakuryente sa Sito Bahay, Barangay Agtatacay Sur, Sapian Capiz kaina sang aga Nobyembre 23, 2023.
Sa impormasyon nga nakuha sang Bombo Radyo sa lugar, ginkilala ang mga biktima nga sanday alyas “John” 21 anyos residente sang Barangay Bilao, Sapian Capiz kag Lola Selda 71-anyos lunsay residente sang Barangay Agtatacay Sur, Sapian Capiz.
Mahibaluan nga samtang nagalakat si alyas “John” aksidente sini nga nasalapay ang kuryente rason sang Iya pagkatumba kag pagkakuryente.
Ginapahayag man nga sang nakita ini sang iya abyan, gilayon nga ginpadulungan ang lola sang biktima nga yara sa bubon nga nagapanglaba agud ipahibalo ang natabo.
Bangud sini, madasig nga ginpalapitan ni Lola Selda ang iya apo agud kun tani luwason apang aksidente man ini nga nakuryente rason sang ila pagkamatay nga duha.
Sa karun, yara na sa isa ka punerarya ang bangkay sang mga biktima kag padayon ang imbestigasyon sang mga otoridad angut sa insidente.
