Yara na sa estable nga kondisyon ang mag-utod nga nadisgrasya samtang nagsakay sa motorsiklo sa Barangay Pawa, Panay, Capiz.
Ang mga biktima amo sanday alyas Bert, 18 anyos, kag alyas Juday, 16 anyos, lunsay residente sang Barangay Bato sa amo nga banwa.
Sa interview sang Bombo Radyo kay Police Captain Eric Deocampo, Officer-in-Charge sang Panay Municipal Police Station, iya ginpahayag nga padulong kuntani sa nasambit nga lugar ang mga biktima sang hinali lang nadulaan sang kontrol sa manibela ang driver sang motorsiklo.
Suno kay Deocampo, bumunggo ang motorsiklo sa steel bridge nga nagresulta sa pagkapilas sang nagkalain lain nga parte sang lawas sang mag-utod.
Nagpahanumdom man ini sa tanan nga motorista nga maghinay sa pagpadalagan kag siguruhon nga magsuksok sang helmet sa tion sang pagbiyahe.
