ROXAS CITY – Nakaplastar ang mga tikang sang DepEd-Capiz Division sa mainit nga tiyempo nga nabatyagan sa probinsya dala sang El Niño.
Sa interview sang Bombo Radyo kay Dr. Miguel Mac Aposin, Superintendent sang DepEd-Capiz Division, ginpahayag sini nga nahibaluan na sang mga manunudlo ang ila dapat himuon sa tion nga mag-abot ang kasubong sini nga sitwasyon.
Suno kay Dr. Aposin, magasaylo ini sa alternative learning delivery mode ukon modular learning ang klase agud indi na magpadulong pa ang mga estudyante sa eskwelahan.
Wala man ini ginapahampang sa initan kun mag-recess kag gina-remind ang mga ini nga mag-inom sang madamo nga tubig.
Samtang ginahulat naman ang mga plano sang mga School Head nga ila ipatuman subong nga tag-ilinit.
Dugang pa ni Aposin nga wala sila sang mahimo kun magdeklarar ang LGU sang suspensyon sang klase kun mataas ang heat index sa probinsya.
