PANITAN, CAPIZ – Pilason ang isa ka mamumugon matapos ginlabo sang iya nakabais nga himata sa Barangay Cogon, Panitan, Capiz.
Ang biktima amo si Eddie Tomano Batuigas, 46-anyos, samtang ang suspek amo si Pacifico Dela Cruz Batuigas, 59-anyos kag lunsay mga residente sang Sitio Kalye 13, sang nasambit nga Barangay.
Sa impormasyon nga nagikan sa Panitan Municipal Police Station, samtang ginasarado sang biktima ang ila kudal nga kawayan, ginpalapitan siya sang suspek nga hubog sa amo nga tion. Ginhambalan sang biktima ang suspek nga magpauli na, apang sa baylo nga magpauli hinali nalang nga nagkuha sang binangon ang suspek kag ginlabo ang biktima sa wala nga butkon. Nag-agaway pa ang duha kag pareho nga natumba sa duta.
Gilayon nga gindala ang biktima sa Bailan District Hospital para sa nagakaigo nga pagbulong.
Narekober naman sa ginluntaran sang insidente ang binangon nga gingamit sa pagpanglabo nga may kahabaon nga 22 pulgada.
Samtang, boluntaryo nga nag-surrrender ang suspek sa Panitan Municipal Police Station (MPS) kag nagapabilin karon sa kustodiya sang kapulisan para sa nagakaigo nga disposisyon.
