ROXAS CITY – Pilas sa magkatuhay nga parte sang lawas ang naangkon sang isa ka mamugon matapos ginaalegar ginlabo sang tricycle driver takna 11:32 kagab-i, Enero 7, 2024 sa Barangay Linateran, Panay, Capiz.
Ginkilala ang biktima nga si alyas ‘Richard’, 34-anyos samtang ang ginatudlo suspek amu si alyas ‘Ariel’, 44-anyos lunsay residente sang nasambit nga lugar.
Sa inisyal nga impormasyon nga nakuha sang Bombo Radyo sa Panay Municipal Police Station, ginaalegar ginbanggaan sang suspek ang biktima kag ginlabo sa nagkalain-lain nga parte sang lawas gamit ang bitbit nga binangon.
Nagresponde sa lugar ang Panay Emergency Response Team kag gindala sa ospital ang biktima para sa pagbulong.
Samtang, gilayon naman nga na-aresto ang suspek sang mga kapulisan.
Sa karon, nagapadayon pa ang imbestigasyon sang Panay PNP kun ano ang motibo sa pagpanglabo.
