MAAYON, CAPIZ – Patay ang 29-anyos nga mamumugon matapos ginluthang sang tiyo sang iya abyan sa Sitio Mansarag, Barangay Canapian, Maayon, Capiz.
Ang biktima amo si alyas “Junior”, residente sang Sitio Cabanbanan sang nasambit nga barangay samtang ang suspek amo si alyas “Berting”.
Sa inisyal nga imbestigasyon sang Maayon Municipal Police Station, yara sa sulod sang balay sang iya abyan nga si alyas “Erl” ang biktima sang nag-abot ang suspek nga tiyo sang iya abyan kag nagasinggitan nga paguwaon si “Erl”.
Sang buksan sang biktima ang pwertahan, gilayon siya nga ginluthang sang suspek sa hitsura kag abaga. Gindala ang biktima sa Bailan District Hospital apang wala na ini nakahingabot kag ginbawian ini sang kabuhi.
Madasig naman nga nagpalagyo ang suspek padulong sa wala mahibaluan nga direksyon.
Ginalantaw nga motibo sang Maayon PNP sa krimen amo ang indi pag-intindihanay kag tuga sang kahulugbon.
Padayon ang hot pursuit operation sang kapulisan agud madakpan ang nagpalagyo nga suspek.
– With a report from Bombo Jessa Mae Siman De Los Santos
