TAPAZ, CAPIZ – Patay ang isa ka mangunguma matapos ginluthang sa guwa sang Civic Center sa Brgy. Abangay, Tapaz, Capiz.
Ginkilala ang biktima kay alyas Poldo, nagapang-edaron sang 41-anyos nga residente sang nasambit nga lugar samtang ang ginatudlo nga suspek amo si alyas Gardo, nagapang-edaron sang 36-anyos nga residente naman sang Brgy. Nayawan sa kapareho nga banwa.
Base sa impormasyon nga nagikan sa Tapaz Municipal Police Station, ginapahayag nga nagalakat paguwa sa Civic Center si alyas Poldo samtang nagatindog naman si alyas Gardo sa luyo sang isa ka multicab. Hinali nalang nga gin-agbayan sang biktima ang suspek sa abaga kag makaligad ang pila segundos gintiro sang suspek ang biktima.
Bangud sini, nag-angkon sang patal nga pilas sa dughan tuga sang pagpangluthang gamit ang ginasuspetsahan nga 12 gauge pistolized homemade shotgun nga armas-luthang.
Gilayon naman nga gindala sa Tapaz District Hospital ang biktima sang iya nga mga himata apang gindeklarar ini sang doktor nga dead on arrival sang doctor nga nag-atendir.
Madasig naman nga nagpalagyo sa lugar ang suspek matapos makumiter ang krimen.
Sa karon, padayon nga nagapatigayon sang hot pursuit operation ang mga kapulisan batuk sa nasambit nga suspetsado.
