ROXAS CITY – Nangin mainit ang Capiz Golden Warriors sa pagsugod sang hampang tubtob sa nakuha ang 77-63 nga daog batuk sa Team Negros Occidental agud tapuson ang 57-year drought sa Basketball Secondary Boys sa Western Visayas Regional Athletic Association (WVRAA) Meet 2019.
Suno kay coach Jeffry Abool, isa sa nangin yabi agud makuha nila ang kampeonato amo ang pagtutok sang kada players sa pagdepensa batuk sa ila kasumpong.
Aminado man si Abool nga kumpiyansa ini nga makuha sang Capiz ang kampeonato bangud daku suno sa iya ang iya nga pagsalig sa mga humalampang sang probinsiya.
Isa man suno sa iya sa nagpabakod sa ila amo ang ila hugot nga pagsalig sa Diyos agud makalab-ot sila sa championship.
Tuman naman ang pagpasalamat ni Janwell Condrad Famaranco, isa sa mga humalampang sang Team Capiz, sa ila nga coach kag sa tanan nga nagbulig agud mangin madinalag-on sila sa ila nga hampang.
Ginpahayag ni Famaranco nga indi sang mahapos ang ila nga inagyan sa trainings agud preparahan ang WVRAA bangud sa ila target nga makahampang sa Palarong Pambansa subong nga tuig.
Sa karon, nagakalipay ang mga Capizeño sa kadalag-an sang Team Capiz kun sa diin ulihi nga nakuha sang probinsiya ang kampeonato sa WVRAA Basketball Secondary Boys sadtong tuig 1962.
