Naglab-ot sa 11,892 ka mga indibidwal ukon 3,864 ka mga pamilya ang nag evacuate sa banwa sang Ivisan kadungan sang pag-igo sang Bagyo Tino.
Sa interview sang Bombo Radyo kay Mayor Felipe Neri Yap, iya ginpahayag nga nangin maayo ang sitwasyon sang banwa apisar nga madamo sang nag-evacuate bangud sa kakugmat sang mabaskog nga hangin kag posibilidad sang pagbaha.
Suno kay Mayor Yap, wala sang natabo nga lapnagon nga pagbaha magluwas sa mga lowland area apang gilayon man nga nag-subside.
Wala man sang nabalhag nga casualty apang may nagluntad nga landslide sa bahin sang Sta. Cruz nga sakop man sang nasambit nga banwa.
Pahayag pa niya, daku ang iya nga pagpasalamat sa tanan nga mga barangay officials kag volunteers nga nag-akomodar sa tanan nga nag-evacuate nga mga pumuluyo sa ila sakop.
Nagapanawagan man ang natungdan nga magpabilin nga alerto kag preparado bangud sa indi mapaktan nga paglain sang tyempo.
Interview by: Bombo Francis Biñas via Bombohanay sa udto
