Kapin sa 200 ka mga tinawo gikan sa Bureau of Fire Protection (BFP) ang gina-imbestigaran angut sa gina-alegar “slot-for-sale” scheme sa recruitment process sang ahensya suno sa Department of the Interior and Local Government (DILG).
Ginpahayag ni Interior Secretary Jonvic Remulla nga ang imbestigasyon nagasakop sa mga tinawo sang BFP sa bug-os nga pungsod bilang kabahin sang mga pagtinguha nga tapnaon ang korapsyon sa sulod sang bureau.
Ginlunsyar ang imbestigasyon kasunod sang entrapment operation nga ginpatigayon sang Criminal Investigation and Detection Group (CIDG) Region 3 sa syudad sang San Fernando, Pampanga sang Agosto 24 nga nagresulta sa pagkadakop sang 32 anyos nga empleyado sang BFP.
Ginpahayag nga nadakpan ang indibidwal nga nagabaton sang ₱300,000 gikan sa isa ka tagreklamo kabaylo sang ginpromisa nga posisyon sa sulod sang BFP.
Nagpaandam si Remulla nga lagson kag pasakaan sang kaso ang mga mapamatud-an nga may kahilabtanan sa pagbaligya sang posisyon.
Target ni Remulla nga tinluan ang BFP kag masolbar ang isyu sa sulod sang anum ka bulan.
