ROXAS CITY – Ginkumpirmar sang mga tag-iya sang liquefied petroleum gas (LPG) stores, nga nagpataas man sila sang presyo kada kilo sang nasambit nga produkto.
Sandig sa presyo sang Petron gasul, may pagtaas nga P7.95 kada kilo sang LPG.
Nagakahulugan nga sa 11kgs., pagalauman nga magadugang ang presyo sang 87.45 pesos kada tangke.
Samtang, sa presyo sang Solane nga brand, nagpasaka ang ila kompanya sang P8 kada kilo, rason nga 88 pesos ang gindugang sa ila 11kgs. nga tangke.
Suno naman sa pila ka mga bumalakal sang LPG, nga wala sila sang ‘choice’ kundi magbakal apisar nga nagtaas ang kada tangke, bangud kinahanglanon ini sa ila pang-adlaw-adlaw nga pagpangabuhi.
Matandaan nga sang Martes, nagtaas man sang 75 tubtob 90 sentimos sa kada litro sang kerosene, diesel kag gasolina.
Ginatudlo nga bangud sa tensyon sang Russia kag Ukraine, naapektuhan ang suplay sang produktong petrolyo sa bilog nga kalibutan.
