ROXAS CITY – Nagpasalig ang alkalde sang Sapian sa mga pumuluyo nga wala sang dapat nga ikaalarma matapos nga ginsulod sang kawatan ang Treasurer’s Office sang munisipyo.
Sa interview sang Bombo Radyo kay Atty. Joe Villanueva, nakaalerto na ang mga kapulisan kag nagadihon na sang tikang agud indi na maliwat ang kaangay nga hitabo kag pagabayluhanay man ang mga palyado nga CCTV’s.
Suno kay Villanueva, makabig nga ‘indi professional’ ang nagsulod nga makawat bangud ang pagpangawat sini, indi sa tion sang swelduhanay sang empleyado, napaslawan ang suspek nga mabuksan ang vault kag natigayon lamang nga mataban ang koleksyon sa pagbayad sang mga permits kag iban pa.
Posible man suno diri nga may imbolbar nga kabataan bangud nag-agi ang mga makawat sa gamay nga bintana sang nasambit nga munisipyo kag gin-una nga sulod ang Vice Mayor’s Office antes ang Treasurer’s Office.
Sa karon, wala pa sang insakto nga kantidad kun pila ang nataban nga kwarta.
Samtang, nagapadayon pa ang imbestigasyon sang kapulisan angut sa insidente.
