Gina-dumilian sang Municipal Environment and Natural Resources Office (MENRO) Panay ang mga residente nga nagaestar malapit sa Panay River nga likawan anay ang pagpaligo, pagpangisda kag pagpanglaba sa suba.
Ini kasunod sang ginpatigayon nga water quality assessment sang Environmental Management Bureau (EMB) kun sa diin natukiban nga mataas ang lebel sang fecal coliform sa nasambit nga suba.
Ang fecal coliform posible nga naghalin sa higko sang tawo, sapat kag iban pa nga mga organic waste.
Sa interview sang Bombo Radyo kay Ramie Detaro, head sang MENRO-Panay, Capiz, iya ginpahayag nga siyam ka barangay sa banwa ang apektado sang mataas nga fecal coliform, kun sa diin lakip sa pinaka-apektado amo ang Barangay Tico, Agbalo, Cogon, Magubilan, kag Lus-onan.
Dugang pa sini, nga padayon ang MENRO sa pagkuha sang mga water sample sa suba agud masiguro ang kaluwasan sang publiko kag ma-monitor kun naga-ayo ukon nagalala pa ang kondisyon sang tubig.
