CAPIZ – Mangin prayoridad sang katapo sang Philippine Army, ang mga banwa nga yara sa idalum sang yellow kag orange category para sa palaabuton nga eleksyon subong nga tuig.
Sa ginpatigayon nga PIA KAPIHAN Episode 31, may kaangtanan sa 2025 Midterm Elections Updates kaupod ang katapo sang Phil. Army 12th Infantry Battalion kag Commission on Election (COMELEC) Capiz, ginsiling sang 12 Infantry Battalion Commander nga si LTCOL. Vicel Jan Garsuta nga ang nasambit nga mga kategorya nagakinahanglan sang dako nga bulig kag aksyon.
Mahibaluan nga sa probinsya yara sa yellow category ang banwa sang President Roxas samtang orange category naman ang banwa sang Tapaz.
Suno kay Garsuta sa palaabuton nga pagpiniliay magatingub sila sang puwersa kaupod ang katapo sang Philippine National Police kag iban pa nga mga ahensya agud mapabilin nga mangin matawhay ang lugar subong man ang seguridad sang mga kandidato kag botante.
Ginpahayag man sini nga sa karun, wala pa sila sang record ukon nabaton nga reklamo may kaangtanan sa eleksyon kag ini ang base man sa ila pagpangusisa sa katapo sang kapulisan.
Nakahanda man suno kay ang ila grupo kag sa pagkamatuod may yara na ini sang mga lugar nga ginhatag kung sa diin sila ma-assign sa tion sang eleksyon.
