Naglab-ot na sa 233 ang numero sang mga evacuees sa Barangay Baybay, Roxas City.
Sa interview sang Bombo Radyo kay Punong Barangay Erwin Oroceo, iya ginpahayag nga nakibot siya sa gulpi nga pagtaas sang tubig bangud mabaskog nga pag-ulan.
Suno kay Oroceo, sa tatlo ka evacuation center sang ila barangay, may yara sang 96 ka mga pamilya ukon 233 ka mga indibidwal lakip na ang mga kalalakihan, kababaihan, mga bata, senior citizen, person with disability kag mga nagabusong.
Pahayag pa niya, nagpatigayon ang barangay council sang rescue operation sa mga nagakinahanglan sang bulig agud maka-evacuate samtang may yara man sang mga pumuluyo nga nagbuluntaryo na nga nagpadulong sa mga evacuation center bangud sa pagtaas sang tubig sa ila lugar.
Dugang pa sang natungdan, padayon ang ila pagmonitor sa sitwasyon sa palibot sang Barangay Baybay kag nagapanawagan man sa mga pumuluyo nga indi anay magbalik kun indi masiguro nga safe na nga balikan ang ila nga mga panimalay.
