ROXAS CITY – Nagdangop sa Bombo Radyo ang duha ka mga himata sang 29 anyos nga lalaki nga nadakpan sa drug buybust operation sa Barangay Cabug-Cabug, President Roxas, Capiz agud ireklamo ang para sa ila ‘planted’ nga operasyon sang mga kapulisan.
Matandaan nga naaresto sang gintingob nga pwersa sang President Roxas, Pilar kag Pontevedra Municipal Police Stations si Abner Isiderio sang Barangay Poblacion, President Roxas matapos makuhaan sang walo ka sachets sang ginapatihan shabu.
Magluwas diri, ginapahayag nga nakuha man kay Isiderio ang P500 nga buybust money, slingbag, charger kag motorsiklo.
Apang ginsaysay ni alyas Inday, himata ni Isiderio, nga indi sang matuod nga may nakuha nga ilegal nga droga sa ginatudlo suspek.
Suno diri nga ginbanggan lamang sang duha ka motorsiklo nga sakay sang mga kapulisan si Isiderio kag ginaalegar ginkasahan sang armas kag nagdeklarar sang buybust.
Ginpahayag sini nga sang una ginpangbukad ang mga kagamitan ni Isiderio, wala diri sang may nakuha ang mga pulis nga ilegal nga droga.
Apang sang tion nga magapalapit kuntani sila sang naga-imbentaryo ang kapulisan, ginbawalan sila kag sa ila kakibot, may nakasulod na nga sachets sang shabu sa suludlan sang powerbank ni Isiderio.
Dugang pa ni alyas Toto, sang pag-abot gid nila sa lugar, palapitan kuntani nila si Isiderio agud usisaon kun ano ang natabo apang ginbawalan sila sang mga pulis.
Suno pa diri nga magakuha man kuntani sila sang mga pictures kag video apang wala man sila ginpahanugutan.
