Nagmandu na ang Office of Civil Defense Region VI sa tanan nga Provincial, City, kag Municipal Disaster Risk Reduction and Management Councils sa Western Visayas nga magpatigayon sang pre-emptive evacuation sa tanan nga high-risk areas bangud sa ginalauman nga epekto sang Super Typhoon “Uwan.”
Sa interview sang Bombo Radyo kay Director Raul Fernandez, director sang Office of Civil Defense Region VI, iya ginpahayag nga sandig ang mandu sa Memorandum No. 89, Series of 2025 nga gin-issue sang Regional Disaster Risk Reduction and Management Council (RDRRMC) Region VI.
Suno kay Fernandez, Base sa abiso sang state weather bureau, ang “Uwan” ang ginalauman nga magsulod sa Philippine Area of Responsibility sa Sabado kag mahimo magdala sang mamunog nga ulan kag mabaskog nga hangin sa dako nga portion sang pungsod.
Ginalaragway ang bagyo nga tuman ka dako nga may diameter nga nagalab-ot halin sa Batanes tubtob sa Bohol, sa diin posible nga maapektohan man ang iban nga lugar.
Bangud sini, tanan nga Local DRRMCs sa Rehiyon VI ang ginamanduan nga magpatigayon sang pre-emptive evacuation sa tanan nga identified high-risk barangays kag coastal zones; i-activate ang Emergency Operations Centers (EOCs) kag siguraduhon ang close coordination sa Regional DRRMC Operations Center; siguraduhon man ang kahandaan sang evacuation centers kag mga pagkaon, tubig, bulong kag health supplies; kag magpaguwa sang timely warnings sa komunidad ilabi na sa vulnerable groups.
Pahayag pa niya, ang direktiba ang may katuyuan nga mahagan-hagan ang casualties kag damages nga mahimo magresulta bangud sa epekto sang super typhoon. Nagpanawagan man ini sa publiko nga magpabilin nga alerto, i-monitor ang mga advisories halin sa gobyerno kag magkooperar sa lokal nga otoridad.
