Nabuhinan naman ang mga lugar nga yara sa idalum sang Tropical Cylone Wind Signal number 1 bangud sa pagluya sang bagyo Basyang.
Sa data sang Philippine Atmospheric, Geophysical and Astronomical Services Administration (PAGASA), ang sentro sang bagyo ang nahamtang sa Ayungon, Negros Oriental.
May kabaskugon ini sang hangin nga nagalab-ot sa 45 kilometros por ora kag pagmadlos nga nagalab-ot sa 55 kph.
Ang mga lugar nga ginapataas ang signal number 1 amo ang Antique, Aklan, Capiz, Iloilo, Guimaras, Negros Oriental, Negros Occidental, Siquijor, Cebu, Bohol; Maasin City, Marcohon sa Southern Leyte; (San Isidro, Calubian, Leyte, Tabango, Villaba, Matag-Ob, Kananga, Palompon, Isabel, Merida, Ormoc City, Albuera, Burauen, City of Baybay, Inopacan, Hindang, Hilongos, Bato, Matalom sa Leyte; Cuyo kag Cagayancillo Islands.
Bangud sa nagapangibabaw nga amihan winds, mabatyagan ang mabaskog nga hangin sa Luzon, Western Visayas, Negros Island Region kag Zamboanga del Norte.
Ginalauman nga lubos nga magaluya ang bagyo sa sulod sang 12 ka oras kag mangin low pressure area.
