Mga pamatan-on sa Japan ginaganyat sang gobyerno nga mag-inom agud mapasanyog ang industriya sang alcohol; ‘sake viva’ campaign nag-angkon sang nagkalain-lain nga komento

ROXAS CITY – Ginaganyat sang gobyerno sang Japan ang mga pamatan-on nga mag-inom sang alcohol agud magpanumbalik ang demand sini sa market kag mapasanyog ang industriya sang alcohol.

Sa pakig-angut sang Bombo Radyo kay Mr. Josel Palma, Bombo International Correspondent sa Japan suno diri, sumugod sang naglupok ang pandemya napilitan ang mga bar kag establishments nga nagabaligya sang alcohol nga magsara bangud sa COVID restrictions nga nagresulta sa pagnubo sang sales kag tax revenues sa pungsod.

Agud masolbar ang ginapangatubang nga problema, naglunsyar ang National Tax Agence (NTA) sang paindes-indes nga ginatawag ‘Sake Viva’ campaign kun sa diin may katuyuan ini nga magkolekta sang mga ideya agud mapasanyog ang demand sa alcohol services, promotional methods, product design kag sales technique sa industriya sang ilimnon.

Magabaton sang suporta kag posible ma commercialize ang ideya sang magadaug.

Apang, ang nasambit nga kampanya ang nag-angkon sang nagkalain-lain nga komento gikan sa mga Japanese netizen bangud sa malain nga epekto sang ilimnon.

Suno kay Palma, ginpakamalaut ini sang pila ka mga japanese bangud wala ginakonsiderar sang gobyerno ang risgo sa ikaayong lawas sang mga pumuluyo.

Ginhatagan man sang pagtamod ni Palma, sang nanligad nga tuig nagpaandam ang Japan Health Ministry sa epekto sang excessive drinking of alcohol ukon masobra nga pag-inom kag makabig ini nga ‘major social problem’ apang sa karon, isa na ini sa nagasuporta sa nasambit nga kampanya kun sa diin nag-angkon sang madamo nga kritisismo.

Dugang pa sini, wala naman mahimo ang pumuluyo kundi magsunod na lamang kun naaprubahan na ini sang gobyerno.

Sa pihak nga bahin, ginakonsiderar na sang japan government ang pagpataas sa numero nga magasulod sa pungsod para sa ila turismo kadungan sa pagluga sang covid restictions.

Mahibaluan, sumugod sa Setyembre 7, indi na pag-e require sang gobyerno ang RT-PCR Test kun fully vaccinated na ini kag may yara sang isa ka dose nga booster shot.