ROXAS CITY – May tagsa-tagsa ka pamaagi ang mga residente sang Barangay Tanque, Roxas City agud matapna ang pagduging sang lamok kag maamligan ang ila ikaayong-lawas batuk sa balatian nga dengue.
Ini ang nahibaluan sa ginpatigayon nga Bombo Patrol 101 sa Barangay sang Bombo Radyo News Team.
Suno kay Manang Ramsy sang Sitio Ilaya, tatlo ka miyembro sang ila pamilya ang nakaangkon sang nasambit nga balatian nga ginalakipan sang iya duha ka mga kabataan kag isa ka hinablos sang nakaligad lamang nga bulan sang Marso.
Bangud diri, mas mahalong na sila kag ginalimitahan ang pagpaguwa sa mga kabataan, nagagamit sang mosquito repellant kag nagakaon sang masustansiya nga mga pagkaon agud mapabilin nga mabakod ang ila immune system.
Talalupangdon naman sa Sitio Calubihan ang mga drainage nga barado bangud sang nagabun-od nga basura.
Suno kay Manang Hilda, agud makalikaw sila sa balatian nga dengue, nagapaninlo ini adlaw-adlaw kag ginapang-ula ang mga butang nga mahimo teniran sang tubig agud indi pagpangitlugan sang lamok.
Suno naman kay Nanay Alma sang St. Francis Subdivision, matapos nga nakaangkon sang dengue ang iya apo, mas nangin responsable pa sila sa pagpaninlo sa palibot agud matabog ang mga lamok.
Mahibaluan nga ang nasambit nga barangay ang ikaapat nga barangay sa siyudad sang Roxas nga may pinakamadamo nga kaso sang dengue.///
