Ginkwestyon sang pila ka mga senador ang natuhoy sa plano nga umpisahan ang impeachment trial Vice President Sara Duterte sa Agosto 4, isa ka semana pagkatapos mag-umpisa ang una nga regular session sang 20th Congress.
Suno kay Senator Panfilo “Ping” Lacson, antes kuntani magdesisyon nga himuon pa sa Agosto 4 ang trial, kinahanglanon anay nga maistoryahan ini sa Senado ukon magpatigayon sang plenary discussion.
Pahayag niya, kinahanglan nga mabatian anay ang mga rason ukon paathag sang kada isa kun ngaa ma-delay ang trial kag pagkatapos ma-istoryahan, mahimo makaboto ang mga senador kun aprubahan ang bag-o nga petsa ukon indi.
Samtang suno naman kay Senator Francis “Kiko” Pangilinan, magapangayo siya sang paathag may kaangtanan sa ginaduso nga schedule.
Pahayag naman ni Senator Vicente Sotto III, nagakadapat nga umpisahan na gilayon ang impeachment trial.
Nagpabutyag man sang kahandaan si Senator Bam Aquino sa tion nga umpisahan gid man ang trial sa Agosto.
Nahibaluan nga si Senator Joel Villanueva ang nagbuyagyag nga ang una nga adlaw sang impeachment trial ni Duterte natalana sa Agosto 4.
