ROXAS CITY – Mahimo nga pasakaan sang kaso nga illegal arrest ukon serious illegal detention kag anti torture law ang mga opisyal sang militar kag Philippine National Police sa tion nga mapamatud-an nga “mistaken identity” ang ila pagdakop kay Baltazar Saldo kadungan sang pagpresentar sa katapo sang media sa Police Regional Office 6 (PRO-6).
Ginpahayag ni Atty. Johnny Dabuco sang Commission on Human Rights (CHR) nga nagguba ang pangalan kag reputasyon ni Saldo magluwas pa nga nabutang sa kahuy-anan ang pangalan sang pamilya Saldo.
Matandaan nga nasal-an si Saldo nga amo si Virgilio Paragan alyas Ka Hassan nga anay commanding officer sang Roger Mahinay Command, Komiteng Rehiyon-Negros sang (CPP-NPA) nga may kaso nga murder kag frustrated murder.
Nahibaluan nga may patong sa ulo nga P1 million 50 thousand pesos si Paragan nga ila nasak-an nga si Saldo.
