Gin-anunsyo sang Pentagon nga gilayon na nila nga pagasuguran ang pag-proseso sang pagkakas sa mas ukon menos 1,000 ka mga transgender troops gikan sa US Military, sandig sa kasuguan ni US President Donald Trump nga nagadumili sa mga transgender nga magserbisyo sa military.
Base sa memo ni Defense Secretary Pete Hegseth, ang mga transgender personnel nga boluntaryo nga nagsiling nga may intensyon na nga maghalin bag-o paman ang Marso 26 ang gilayon nga iproseso para sa separasyon.
Samtang ang mga wala luyag nga maghalin ang obligado nga pahalinon pag-abot sang Hunyo 6 (para sa mga active-duty) kag sa Hunyo 7 naman (para sa reserves).
Nahibaluan nga may kabug-usan 4,240 nga mga miyembro sang military ang na diagnose nga may gender dysphoria sang tinalikdan nga tuig, suno sa Department of Defense kag sa ila tanan may yara sang ginabulubanta 1,000 ang mahimo nga mapaidalom sa bag-o nga mga patakaran.
Madumduman nga nagpaguha si Trump sang executive order sang Enero 27, kun sa diin ginpahayag sini nga ang “false gender identity” ang indi nagasanto sa mataas nga mga patakaran sang serbisyo military kag ginsundan man ini sang Pentagon memo sang Pebrero nga kun sa diin ginpahayag man diri nga pagakakson ang mga transgender troops magluwas na lang kun may special waiver ang mga ini.
Samtang, ginapahayag nga ang polisiya ang kabahin sang serye sang mga pagbag-o sa patakaran natuhoy sa transgender service members kun sa diin nangin mas matawhay sa idalom sang Democratic administrations, kag mas nangin istrikto sa idalum sang pagpanguna ni Trump.
