Ginbuyagyag ni anay Senador Antonio Trillanes IV nga naglab-ot sa P181.65 million ang kabug-usan nga kantidad nga ginaalegar nabaton sang mga pamilya Duterte gikan kay Samuel “Sammy” Uy nga iya gintumod nga isa ka drug lord.
Suno kay Trillanes, ang mga transaksyon natabo sa tunga-tunga sang 2011 kag 2013, kon sa diin ang iban ginhimo paagi sa cashier’s checks kag personal checks.
Para kay anay Presidente Rodrigo Duterte, ginpahayag ni Trillanes nga nakabaton siya sang P15.6 million halin kay Uy.
Suno sa detalye nga ginpresentar ni Trillanes, natabo ang mga transaksyon humalin Nobyembre 2011 tubtob Abril 2013, sa tatlo ka magkatuhay nga transaksyon.
Samtang, ginpahayag naman ni Trillanes nga P22 million ang ginaalegar nga nabaton ni Vice President Sara Duterte halin kay Uy.
Suno sa mga detalye nga iya ginpresentar, nagalakip ini sang tatlo ka transaksyon nga natabo sa tunga-tunga sang Marso 2011 kag Abril 2012.
Sa bahin naman ni Davao City Rep. Paolo Duterte, ginpahayag ni Trillanes nga ginaalegar nakabaton ini sang kabug-usan nga P38 million.
Suno kay Trillanes apat ka mga transaksyon nga natabo sa tunga-tunga sang Marso 2011 kag Oktubre 2012.
Si Davao City Mayor Sebastian “Baste” Duterte ang ginaalegar nakabaton sang P51 million suno kay Trillanes.
Ginpahayag nga ang nasambit nga kantidad ang may kahilabtanan sang lima ka mga transaksyon halin sang Marso 2011 tubtob Abril 2013.
Samtang, ang pinakadako nga gintingob nga kantidad sa listahan ni Trillanes ang ginaangut kanday Cielito “Honeylet” Avanceña kag Veronica “Kitty” Duterte nga ginapahayag nagalab-ot sa P53 million.
Ini nga numero naghalin sa lima ka transaksyon nga natabo sa tunga-tunga sang Marso 2011 kag Abril 2013.
