PRESIDENT ROXAS, CAPIZ- Ginsulod sang wala pa makilan-an nga kawatan ang isa ka motorshop sa Barangay Poblacion Swa, President Roxas, Capiz.
Sa interview sang Bombo Radyo kay Marivel Orola Dariagan, tag-iya sang amo nga shop, iya ginpahayag nga nakibot nalang sya sang nakita na nya nga ang iya shop nakabukas na ang roll-up.
Dugang pa sini, sa nasambit nga roll-up, duha ka mga dalagko nga kandado ang ginagamit sa pagsirado apang, natigayon pa ini maguba pamaagi sang ginapahayag volt cutter nga gingamit sang amo nga kawatan.
Nahibaluan nga nataban sang amo nga kawatan ang mga tubeless nga goma, piggy bank nga nagasulod sang kapin P20,000, duha ka bentahan nga may mga sulod nga coins, kag mga original nga tools.
Pahayag pa ni Dariagan, naka-off ang Closed-Circuit Television (CCTV) bangud nga ginapatay sini ang breaker sang kuryente agud makalikawa sa sunog.
Sa karon, nagapadayon ang imbestigasyon sang mga kapulisan agud matumod ang pagkakilanlan sang amo nga kawatan.
Interviewed by Bombo Sunnie Mae Constantino Batencila
