ROXAS CITY – Posible nga mapasakaan sa kaso ang nagmaltrato-patay sa isa ka ido sa sa Barangay Blasco, Pilar Capiz.
Sa interview sang Bombo Radyo kay City Councilor Gregory Potato , ginsiling sini nga indi bastante nga rason nga nagapamintas ang ido sa iban nga sapat ukon nagakaon sang itlog sang mga ginahuptan nga manok agud sakiton tubtob nga mapatay ang ido.
Suno kay Councilor Potato, kun mangin responsible lang kun tani nga tag-iya sang sapat indi magresulta sang subong sini kag indi magpanghalit sa iban nga sapat ukon sa tawo.
Ini matapos nagtrending online ang pagmaltrato sang ginapahayag isa ka SK Chairman sa amu nga lugar sa isa ka ido nga ginhigot kag ginsapute pinaagi sa pagbakbak sang kahoy tubtob nga ginbawian ini sang kabuhi.
Bangud sini, ginklaro ni Concilor Potato pananglitan nga mapamatud-an nga isa ka Barangay Official ang may kahimuan sini posible nga magapangatubang ini sang 3 ka tuig nga pagkapreso kag penalidad nga P250,000.00, apang kung isa ka ordinaryo nga pumuluyo ang nagpatay sa ido mahimo ini nga mapreso sang 2 ka tuig kag penalidad nga P100,000.00.
Apang kung ginsakit lamang ang ido kag wala na-injured, mahimo nga mapreso ang isa ka violators sang tubtob 6 ka bulan kag kapin P30,000.00 nga penalidad.
Ginpahayag man ni Councilor Potato nga mahimo magfile sang kaso ang bisan sin-o nga witness sa lugar apisar nga indi tag-iya sang amu nga ido bangud makabig ini nga isa ka public crime.
Mensahe sini sa mga nagahupot sang ido, atipanon sang intsakto kaangay sa pag-atipan sang tawo bangud apisar nga sapat lamang ang mga ini may yara sa gihapon sila sang balatyagon.
Sa karun, padayon pa ang imbestigasyon angut sa insidente.
