ROXAS CITY – Pormal na nga ginsuguran sang Bureau of Jail Management and Penology (BJMP), kahapon nga adlaw ang National Correctional Consciousness Week 2022, programa para sa mga Person Deprived of Liberty (PDL).
Sa interview sang Bombo Radyo kay J/SINSP Rodel Morales, Jail Warden sang BJMP Roxas City, tinutuyo sang nasambit nga programa nga mapalab-ot sa mga pumuluyo ang mga gina-implementar nga programa sang ahensya para sa mga detainee kag mahibaluan ang estado sang pasilidad kag inmates.
Suno kay Morales, nakasentro ini sa tatlo ka programa agud mabuligan ang mga detainee sa pag atubang nila sa komunidad.
Una na diri ang edukasyon kun sa diin nagapadulong ang mga ALS teacher agud tudluan ang mga inmates, Technical and Skill Training sang TESDA kag Spiritual and Moral kun sa diin may yara sang nagapatigayon sang Bible Study.
Ang nasambit nga sektor ang tikang sang ahensya agud ipreparar ang mga inmates pananglitan magguwa na sila sa pasilidad.
Ginklaro man sini nga mga detainee sa BJMP ang indi pa convicted bangud ongoing pa ang ila trials.
Mahibaluan nga magadugay sa sulod sang isa ka semana ang amu nga programa.
