Nagapanindugan ang National Bureau of Investigation (NBI) nga wala gina-tolerate sang talatapan ang mga personnel kun may sala nga ginhimo.
Ini kasunod sang pagdakop sang Traffic Management Unit (TMU) Roxas City kay alyas Jabar nga temporaryo nga night watchman sang NBI Capiz sa diin narekober ang isa ka .45 caliber pistol kag duha ka magazine nga loaded sang bala sa Pueblo de Panay.
Sa interview sang Bombo Radyo kay Agent John Katipunan, Executive Officer sang NBI -Capiz District Office, iya ginpahayag nga kun lawful man lang ang pag-aresto sa ila nga tawo kag nag-agi sa proseso, wala sila sang mangin problema dira.
Apang base sa imbestigasyon nga ila ginpatigayon, isa ka chartered place ang Pueblo de Panay kag indi mahimo maka-operate kun wala sang lisensya.
Suno sa iya, may yara sang special place ang TMU nga mahimo sila makapangdakop apang sa terminal market lang.
Pahayag sang natungdan, may yara pa sang paglagas nga natabo nga daw kaangay nga gin-single out lang si alyas Jabar.
Sa pagkahibalo ni Agent Katipunan, indi colorum ang motorsiklo nga ginamaneho ni alyas Jabar bangud service vehicle ini sang pamilya.
Base sa imbestigasyon sang NBI Capiz, sala ang procedure sang pagkuha sang ebidensya bangud ginkuha pa ang bag ni alyas Jabar apisar wala man ang TMU sang search warrant kag wala man sang Oplan Bakal.
Suno kay Agent Katipunan, kun colorum ang isa ka tricycle, dapat ang obligasyon sang TMU amo nga lantawon ukon kuhaon ang linsensya kag registration.
Apang ang natabo pahayag niya, gin-agaw ang bag kag ginaalegar may unod nga armas kag ginapahayag gintaya sang isa ka TMU officer kay alyas Jabar.
Suno kay Agent Katipunan, indi pa masiling kun iya gid man ni alyas Jabar ang armas.
Sa tion nga mapamatud-an nga gintayaan gid man sang armas si alyas Jabar pahayag sang natungdan, mahimo gid nga mapasakaan sang kaso ang TMU officer sang grave threats ukon attempted homicide, kag kun regular employee ini sang gobyerno, pwede pa ini mapasakaan sang reklamo sa Office of the Ombudsman kag sa Civil Service Commission.
Liwat nga gina-emphasize sang NBI Capiz sa publiko nga wala nila gina-tolerate ang ila mga tawo nga gamiton ang opisina para sa personal nga agenda rason nga naghimo man sila sang kaugalingon nga imbestigasyon sa natabo agud mangin patas.
Nagapanindugan man ang ahensya nga ang ila mga tawo wala sang derogatory record, indi kaangay sa TMU pahayag niya nga may empleyado nga ginaalegar may kaso nga murder.
Nahibaluan nga si alyas Jabar ang nagatrabaho sa NBI Capiz sa sulod sang anum ka bulan kag indi isa ka regular employee.
Siya ang naga-upod sa iya pakaisa kun gab-i nga magbantay sa vicinity sang opisina.
