Nag-request ang National Bureau of Investigation (NBI) sang mga dokumento kag reports halin sa Commission on Audit (COA) kag sa Securities and Exchange Commission (SEC) may kaangtanan sa 2019 SEA Games kag sa Philippine Games Organizing Committee (PHISGOC).
Sa sulat nga napetsahan Hulyo 21 kag pirmado ni NBI Director Melvin Matibag, nag-request ang ahensya sang isa ka kopya sang final COA Audit Report nga nagasakop sa Philippine Sports Commission angot sa 2019 SEA Games kag PHISGOC.
Suno kay Matibag, importante ang mga dokumento sa pag-verify sang mga findings, pag-establisar sang facts kag ma-trace ang pondo nga makabulig sa opisyal nga pag-imbestigar.
Pahayag sang NBI, ila imbestigaran ang ginaalegar iregularidad, maanomaliya sa pondo kag posible paglapas sa anti-graft, corruption kag related laws nga naga-involve sang pondo, disbursements kag procurement activities nga naangot sa SEA Games kag PHISGOC, lakip na ang transaksyon sa Philippine Sports Commission.
