Ginkumpirmar sang Northern Luzon Naval Command (NLNC) ang paglayag sa kadagatan nga nasakop sang Bajo de Masinloc sa West Philippine Sea (WPS), sa idalom sang Exclusive Economic Zone (EEZ) sang pungsod.
Suno sa NLNC, nagpatigayon sang routine maritime patrol ang BRP Apolinario Mabini (PS36) sa nasambit nga kadagatan sa pagpanguna ni Commanding Officer, Cdr Christopher Neil Calvo.
Kabahin sang ginpatigayon nga maritime patrol amo ang Intelligence, Surveillance, and Reconnaissance (ISR) operations sa koordinasyon sang Philippine Coast Guard (PCG) vessel BRP Suluan (MRRV 4406).
Ginbuyagyag sang naval command nga pila ka mga sakayan pandagat sang Chinese Coast Guard (CCG) ang yara sa lugar sang ginpatigayon ang pagpatrolya.
Gilayon man nga nagpalapit ang isa ka CCG vessel sa BRP Antonio Mabini sang yara na ini sa 8.5 milyas northeast sang Bajo de Masinloc kag gintuyo nga pauntaton ang barko sang Pilipinas sa pagpatigayon sang legal patrol sini.
Apang padayon man ang pagbiyahe sang sakayan pandagat sang Pilipinas, sa pihak sang pamahog halin sa barko sang China.
Ginpabilin sang command nga legal ang pagpatrolya kag padayon ini nga pagahimuon agud maamligan ang kinamatarung sang Pilipinas sa kadagatan nga yara sa ila hurisdiksyon.
