ROXAS CITY – Arestado ang isa ka nursing attendant matapos nadakpan sa ginkasa nga drug buybust operation sang gintingob nga pwersa sang Philippine Drug Enforcement Agency (PDEA) kag Provincial Drug Enforcement Unit (PDEU) sa Inocencio Street, Barangay Tiza, Roxas City.
Ginkilala ang nadakpan kay Alex Anthony Agdalipe, 35 anyos sang Barangay Loctugan, Roxas City kag isa ka nursing attendant sang Roxas Memorial Provincial Hospital.
Suno kay PDEA Agent Janette Reyes, humalin pa sang bulan sang Enero sini nga tuig sang ila ginmonitor ang ilegal nga aktibidad ni Agdalipe.
Gindugang pa sini nga si Agdalipe ang nagasuplay sang ilegal nga droga sa mismo mga empleyado sang nasambit nga ospital nga naga-duty sang graveyard shift.
Narekober sa suspek ang tatlo tanan ka sachets sang ginapatihan shabu, isa ka unit sang cellphone kag P1, 000 nga marked money.
