Ginduso sang Office of the Civil Defense (OCD) kay Presidente Ferdinand Marcos Jr nga magdeklarar sang state of calamity sa Eastern Visayas (Rehiyon 8) bangud sa nagapadayon nga kapierdihan sa ekonomiya sa syudad bangud sang load restrictions sa San Juanico Bridge.
Suno kay OCD spokesperson Director Chris Noel Bendijo, mapadasig ang pagpagwa sang pondo kun ipatuman ang state of calamity sa rehiyon kun sa diin mapadasig ang rehabilitasyon sang tulay.
Madumduman nga partially closed sa mga motorista ang San Juanico Bridge matapos ginpatuman sang Department of Public Works and Highways (DPWH) ang three-ton weight limit sadtong Mayo 14 bangud sa kadaanon na sang tulay. Bangud sini, gindeklarar ang state of emergency sa bug-os nga probinsya sang Samar.
Suno sa pag-usisa sang mga enhinyero, malapad nga kalawang, deformed steel members, kag guba nga mga koneksyon ang nakita sa tulay. Sa subong, ang mga tikang nga ginpatuman nagalakip sang pagdumili sang mabug-at nga mga kargamento, pag-regulate sang one-way traffic para sa mga mamag-an nga salakyan, kag pagpadala sang mga barge para sa mabug-at nga mga kargamento.
Nahibaluan nga ang load limit ang nagtuga na sang pagka-stranded sang masobra 200 ka mga salakyan kag ginabulubanta nga magatuga sang P300 million tubtub P600 million nga bulanan nga kapierdihan sa ekonomiya.
Samtang, ang DPWH ang magadeterminar sang kantidad sang kinahanglanon nga rehabilitation funds kag ang OCD ang maga-analisar kag magasumiter sa National Disaster Risk Reduction and Management Council (NDRRMC) antes ipasa sa Office of the President.
Sa pihak nga bahin, nagpakig-angut ang OCD sa Department of Trade and Industry (DTI) agud ipatuman ang price freeze sa mga nagapanguna nga balaklon agud makontrol ang presyo sa tunga sang ginalauman nga pagkatublag sa supply chain.
