Nagpaandam ang Office of the Civil Defense (OCD) Region 6 nga dapat siguruhon sang tanan nga construction companies kag lokal nga gobyerno ang pagsunod sa National Building Code sa pungsod agud maprotektahan ang publiko sa katalagman sang linog kag iban pa nga sahi sang kalamidad.
Sa interview sang Bombo Radyo kay OCD Region 6 Director Raul Fernandez, iya ginpahayag nga ang nagluntad nga 6.9 magnitude nga linog nga nagtay-og sa Bogo City, Cebu ang isa ka pahanumdom nga kinahanglan mabakod kag safe ang mga ipatindog nga imprastraktura.
Suno kay Fernandez, ang mga Local Government Unit (LGU) ang may yara sang obligasyon nga siguraduhon nga magasunod sa standard ang mga ipatindog nga mga imprastraktura sa ila lugar.
Pahayag pa niya, hugot man nga ipatuman ang paghatag sang building permits bangud kinahanglan nga mausisa sang maayo ang structural integrity bag-o hatagan sang pahanugot.
Apisar wala sang may nabalhag nga pagkaguba sang mga building sa Region 6, may yara sang pila ka mga istruktura nga nakitaan sang litik rason nga indi dapat pagpabay-an ang posibilidad sang pagluntad sang mabaskog nga linog sa pungsod.
