Nakagastos ang Office of the President sa idalom ni Presidente Ferdinand Marcos Jr sang yara sa P4.57 bilyon sa confidential kag intelligence funds sang 2023.
Suno sa Annual Financial Report sang Commission on Audit nga ang Office of the President ang siyang nanguna nga nakagastos sang ila confidential kag intelligence funds sang nakaligad nga tuig.
Ang nasambit nga balor nga P4.57-B sang nakaligad nga tuig ang mas mataas ikumparar sang 2022 nga may ara lamang nga P4.51-B.
Sa nasambit nga balor, P2.2-B diri ang para sa confidential expenses samtang P2.3-B naman ang ginlista sa intelligence expenses kag ang masobra P10-M naman ang gingamit para sa extraordinary kag miscellaneous expenses.
Ang Confidential expense ang mga gastuson nga may kinaangtanan sa surveillance/ confidential activities sa mga civilian government agencies para sa pagsuporta sang mandato ukon operasyon sang ahensiya.
Yara sa ikaduha nga puwesto naman ang Department of Justice sa may dako nga nagastos nga confidential funds nga nagakabalor naman sang P683.85-M.
Ang nasambit nga balor ang ginakalakipan sang gastos gikan sa Office of the Secretary, National Bureau of Investigation kag Bureau of Immigration.
Yara naman sa ikatatlo nga puwesto ang Office of the Vice President nga may yara nga P375-M, pang-apat ang National Intelligence Coordinating Agency nga may P127.41-M, National Security Council nga may P90-M, Department of National Defesne nga may P78.92-M kag Department of Interior and Local Government nga may P75-M.
