Nagtaas ang padala nga kwarta sang mga Overseas Filipino workers (OFWs) sang Disyembre 2025, nga nagdala sa kabilugan nga remittances sa bug-os nga tuig sa record nga $35.634 billion, suno sa Bangko Sentral ng Pilipinas (BSP).
Sandig sa datos, naglab-ot sa $3.522 billion ang cash remittances para sa bulan, mas mataas sang 4.2% kun ipaanggid sa pareho nga bulan sang 2024. Ginpangunahan sang mga land-based workers ang padala nga may $2.83 billion, samtang ang sea-based workers may $0.69 billion.
Nagapabilin nga nagapanguna nga ginhalinan sang remittances ang United States nga may 39.7%, ginsundan sang Singapore (7.3%), Saudi Arabia (6.6%), Japan (5.0%), kag United Kingdom kag UAE (tig-4.6%).
Nagdabong man ang personal remittances, kalakip ang cash kag in-kind transfers sa informal channels, nga naglab-ot sa $3.892 billion sang Disyembre, nga nagdala sa full-year level sa $36.619 billion, nagtaas sang 3.3% halin 2024.
