SAUDI ARABIA – Wala na sang plano ang mga Overseas Filipino Workers (OFW’s) sa Hail, Saudi Arabia nga magpauli sa Pilipinas.
Ini ang ginkumpirma ni Pinay OFW nurse Marish Delos Santos, tumandok sang Barangay Maralag, Mambusao, Capiz sang ma-interview sang Bombo Radyo.
Aminado si Delos Santos nga nahadlok sila para sa ila seguridad nga mga OFW’s apang nagapabilin sila nga naka-alerto sa posibilidad nga may matabo nga kinagamo sa ila lugar bangud sa nagapadayon nga tensyon sa tunga sang US kag Iran.
Suno kay Delos Santos nga hugot ang seguridad nga ginahatag sang Saudi Government sa ila kalakip na ang mga nurses sang King Salman Hospital.
Apang, indi malikawan ni Delos Santos nga makabatyag sang kahadlok sa tion nga yara sila sa guwa sang mga malls ukon sa nagkalain-lain nga lugar sa Saudi Arabia.
Sa karon wala pa sang plano nga magpauli si Delos Santos sa Pilipinas bangud nagapabilin nga hilway kag wala sang kinagamo sa ila lugar.
Samtang, suno kay Bea Lacson, isa ka nurse sa Dammam, Saudi Arabia, nga desidido na sila nga mga OFW’s nga maghalin sa ila trabaho sa oras nga may patigayunon nga repatriation order sa nasambit nga pungsod.
Apang, nabalaka si Lacson kun sa diin naman ini magakuha sang kwarta para sa iya pamilya sa ila nga nagabangon lamang sila matapos ang pagpanalasa sang bagyo nga Ursula sa Pilipinas sang tinalikdan nga tuig.
Sa karon, nagapabilin kag luwas ang Dammam, Saudi Arabia bangud wala pa naman sang pamahog sa ila seguridad.
