ROXAS CITY, CAPIZ – Ginpanugyanan sang Barangay Official sang Brgy. III, Roxas City ang publiko nga indi magpadulong ukon maglantaw sa natiphag nga porsyon sang promenade sa Lapu-Lapu Street bangud indi mapulong ang disgrasya kag kun magtaob ang tubig may posibilidad nga matiphag naman liwat.
Sa interview sang Bombo Radyo kay Punong Barangay Nelson Ignacio, iya ginpahayag nga sang damlag lang ginpadulungan sang City Government sa pagpanguna ni Mayor Ronnie Dadivas kaupod ang mga engineers kag gin-inspeksyon ang narumpag nga promenade.
Suno kay Ignacio nga ginpahayag sang alkalde nga base sa pagtsekyar sang mga engineer, ang river control ang rason sang pagkarusdak bangud sa kadugayon ukon pila na ini ka dekada umpisa sang gintukod.
Dugang pa sang natungdan nga wala man sang kabilya ang amo nga river control nga ginasulod sang tubig kag ulan nga isa sa mga rason sang pagkatiphag.
Pahayag pa ni Ignacio nga may mga plano na ang City Government para sa pagkaayo sang amo nga river control.
Sa subong, 24/7 nga ginabantayan sang Barangay Peacekeeping Action Team ang nasambit nga lugar agud indi mapalapitan bangud may area nga indi pwede maagyan sang tawo.
