Ginpangunahan ni Presidente Ferdinand R. Marcos Jr sang Biernes ang opisyal nga paglunsar sang iya flagship nga P20-per-kg. rice program sa Bien Unido, Bohol.
Ang inisyatibo nga ginatawag “Benteng Bigas, Meron Na,” ang ginapatuman sang Department of Agriculture (DA) kag nagatanyag sa mga kwalipikado nga Pilipino sang P20/kilo sang bugas.
Ang initial rollout sa Bien Unido makabenepisyo sa 2,700 ka mga pumuluyo, lakip ang mga senior citizens, solo parents, persons with disabilities (PWDs), mga benepisyaryo sang Pantawid Pamilyang Pilipino Program, mga mangunguma, mga mangingisda, kag mga minimum wage earners.
Samtang yara sa Bohol, gin-usisa man ni Marcos ang Yaman ng Kalusugan Program (YAKAP) Caravan sang Philippine Health Insurance Corporation (PhilHealth) agud maobserbahan ang operasyon kag proseso sini sa Mandaug Elementary School sa banwa sang Calape.
Ang YAKAP, nga ginlunsar sang Presidente sang Hulyo, nagatanyag sang mas komprehensibo nga pprimary care package, lakip ang dugang nga mga bulong kag essential drugs, ginpauswag nga laboratory procedures, kag cancer screening tests sa accredited primary care facilities.
