Makabaton na karon sang mas barato nga bugas ang mga benepisyaryo sang Walang Gutom Program (WGP) sang Department of Social Welfare and Development (DSWD) sa idalum sang bag-o nga partnership sang Department of Agriculture (DA) kag Kadiwa ng Pangulo.
Sa idalum sang inisyatibo nga ginhingadlan “Benteng Bigas, Meron Na sa WGP,” ang mga benepisyaryo ang makabakal sang bugas sa balor nga P20 kada kilo sa DA-accredited retailers kag Kadiwa outlets.
Opisyal nga ginlunsar ang nasambit nga programa kadungan sang food redemption activity sa Barangay 69, Tondo, Manila sadtong Huwebes, Hulyo 10.
Suno kay DSWD Secretary Rex Gatchalian, tinutuyo sini nga mangin barato ang masustansya nga pagkaon para sa mga pamilya nga mas nagakinahanglan.
Makabenepisyo ini sa mga nagasolo nga ginikanan, mga tigulang, kag mga tawo nga may kasablagan nga narehistro sa WGP.
Una, ang tagsa ka pamilya ang nagabaton sang P3, 000 kada bulan nga food credits pinaagi sa electronic benefit cards sang ahensya, nga sarang magamit sa pagbakal sang bugas kag iban pa nga pagkaon.
Suno kay DA Secretary Francisco Tiu Laurel Jr., magluwas sa pagbulig sa mga pigado, ang programa nagabulig man sa pagbakal sang bugas gikan sa mga lokal nga mangunguma sa makatarunganon nga presyo.
Target sang Walang Gutom Program nga malab-ot ang 750,000 ka benepisyaryo nga pamilya sa tuig 2028. Samtang 300,000 ka pamilya ang nabuligan na sang nasambit nga programa.
